’n Student aan die Universiteit Stellenbosch (US) se eerste debuutroman is onlangs landswyd gepubliseer.
Joha van Dyk (23), wat tans haar meestersgraad in Engels aan die US voltooi, se Afrikaanse roman, Branderjaer, het op 13 Oktober op die winkelrakke verskyn.
Maretha Swanepoel, Joha van Dyk se vriendin, het spesiaal vanaf Villiersdrop ingery om saam met Van Dyk na haar boek op winkelrakke te gaan kyk. Toe Van Dyk haar roman in Bargain Books langsaan Marita van der Vyver se boek sien, het sy in die gange van Eikestad-winkelsentrum “uitgefreak”. Sy en Maretha het onmiddellik haar sukses gaan vier. FOTO’S: Verskaf/Maretha Swanepoel 
Maretha Swanepoel, Joha van Dyk se vriendin, het spesiaal vanaf Villiersdrop ingery om saam met Van Dyk na haar boek op winkelrakke te gaan kyk. Toe Van Dyk haar roman in Bargain Books langsaan Marita van der Vyver se boek sien, het sy in die gange van Eikestad-winkelsentrum “uitgefreak”. Sy en Maretha het onmiddellik haar sukses gaan vier. FOTO’S: Verskaf/Maretha Swanepoel
Volgens Van Dyk het NB-Uitgewers haar verlede maand in kennis gestel dat Human & Rousseau haar roman gaan publiseer en 2 500 eksemplare gaan druk.
Die titel van die boek het Van Dyk bygeval toe sy en haar gesin in 2018 ’n rit op een van die rooi toerbusse deur Kaapstad geneem het.
“Ons het verby Seepunt gery en toe sê die toergids dat daar baie branderjaers van reg oor die wêreld kom om die branders te kom geniet,” het Van Dyk gesê. “Ek het die woord, [“branderjaers”], neergeskryf in my notaboekie. Twee maande later toe ek dit weer raaklees, het ek begin skryf.”
Volgens Van Dyk het sy op die name van die vyf Branderjaers teëgekom in ’n blokkiesraaisel-woordeboek wat sy besit. Sy het gesê dat sy “randomly” by die woord “ekstreem” opgeëindig het. Langsaan het daar vyf woorde gestaan: “bittereinder”, “vuurvreter”, “kanniedood”, “stokebrand” en “klipvreter”. Sy het toe dié vyf woorde as die noemname van die Branderjaers gebruik. FOTO: Facebook/NB-Uitgewers
Volgens Van Dyk speel die boek in ’n fiktiewe, Suid-Afrikaanse dorp genaamd Stormbaai af.
“Die storie handel oor Deidre Anker. Haar pad kruis met Louw Swanepoel wat ’n Branderjaer is,” het Van Dyk gesê. “Deidre begin besef dat daar meer agter die Branderjaers is as wat mense dink en sy word met die loop van die storie al hoe dieper in hulle gevaarlike besigheid ingetrek.”
Van Dyk het vertel dat haar boek vanuit twee karakters, Deidre en Louw, se oogpunte vertel word. Haar boek sentreer rondom die temas van identiteit, dwelmmisbruik, boeliegedrag, groepsdruk en broederskap. Dié lokprent is vervaardig om lesers lus te maak vir die storie van die Branderjaers. VIDEO: YouTube/ NBPublishers
Jong skrywers soos Van Dyk bring ’n nuwe generasie van lesers saam met hulle, het Hevette Ates, ’n reklamekoördineerder van Human & Rousseau se kinder-en-jeugboekafdeling, gesê.
“Debuutskrywers, oud of jonk, waag meer met inhoud. [Hulle skryf] sonder gevestigde vrese of onsekerheid,” het Ates gesê.
Jong stemme in Afrikaanse literatuur is belangrik, omdat hulle meer relevante temas in stories inwerk waarmee die hedendaagse jeug kan vereenselwig, het Van Dyk gesê.
Joha van Dyk het op 17 Oktober op storieMAKER se Instagram-blad regstreeks ’n voorlesing uit haar boek gedoen. Sy het ook meer gepraat oor haar roman en die karakters. VIDEO: Instagram/storieMAKER
Volgens Van Dyk is skryf haar passie.
“Ek onthou in my eerste jaar as ’n student op Stellenbosch, moes ons ons grootste droom op ballonne neergeskryf het en dit in die lug vrygelaat het,” het sy gesê. “Ek het geskryf dat ek ’n gepubliseerde skrywer wil wees en noudat ek wel gepubliseerd is, voel dit nogsteeds onwerklik.”
“Musiek het my gehelp om my boek te skryf en die mood van die karakters en gebeurtenisse te skep,” het Joha van Dyk gesê. Dié speellys het sy saamgestel om Branderjaer te komplementeer. SPEELLYS: Spotify/Branderjaer
Simone Hough, Van Dyk se uitgewer by Human & Rousseau, vertel dat Branderjaer ’n belangrike storie is wat belangrike kwessies soos boeliegedrag en identiteit uitlig.“Branderjaer is ’n aangrypende verhaal wat ’n mens laat regop sit en jou boei tot op die laaste bladsy. [Van Dyk] is ’n talentvolle, hardwerkende en baie opwindende nuwe jong stem in Afrikaanse jeugfiksie,” het Hough gesê.