ʼn Groep studente in elektroniese ingenieurswese aan die Universiteit Stellenbosch (US) is tans in die proses om die heel eerste mensagtige robot wat in Suid-Afrika vervaardig is, te bou.
Dit is volgens Dr William Duckitt, ʼn lektor by die departement van elektriese ingenieurswese aan die US, wat die projek gelei het.
“Dis die eerste mensagtige robot wat in Suid-Afrika, eintlik Afrika, gemaak is,” het Duckitt gesê.
“Die enigste ander universiteit in Afrika wat ʼn mensagtige robot het, is die Universiteit van Tshwane, maar hulle een is ingevoer van China af. Dis nie deur hulle plaaslik gebou nie,” het João Petro de Freitas, wat tans sy meestersgraad in robotika doen, gesê. Hy het aan die kop en materiaal-oortreksels van die robot gewerk, het De Freitas gesê.
Die mensagtige robot genaamd George V0.1, is die heel eerste mensagtige robot wat in Suid-Afrika gebou is, volgens Dr William Duckitt, ʼn lektor in elektriese ingenieurswese aan die Universiteit Stellenbosch, wat die studente gelei het deur die projek. George V0.1 is by die Universiteit Stellenbosch se opedag op 15 Maart bekendgestel. FOTO: Anja van Zyl
Die projek het in Junie verlede jaar afgeskop, en is moontlik gemaak deur die samesmelting van drie voorgraadse projekte in finalejaar-studies, het Duckitt gesê.
Al drie studente doen vanjaar hulle meestersgraad in robotika by die departement van elektriese ingenieurswese, en beplan om hul robot teen die einde van vanjaar te voltooi, het Connor Robertson, ʼn meestersgraadstudent in elektriese enginieurswese, gesê. Robertson het aan die bolyf van die robot gewerk.
Gebou met ʼn klein begroting
Boonop is die robot ook met ʼn fraksie van die koste van so ʼn projek gebou, volgens Robertson.
Die drie studente het elkeen ʼn begroting van ongeveer R4 500 gehad om hul deel van die robot te ontwerp en bou. Mensagtige robotte kan tot R300 000 kos, het Robertson gesê.
“Dit is baie belowend dat ons die aanvanklike konsepte bekostigbaar kon bewys, wat dan robotiese KI-navorsing en ʼn stabiele platform vir toekomstige navorsing moontlik maak,” het Robertson gesê.
“George is gebou deur die gebruik van ʼn klomp toepassings wat vrylik beskikbaar is en maklik is vir almal om te gebruik,” het De Freitas gesê.
Die robot word tans gebruik as ʼn navorsingsplatform vir toekomstige hardeware- en sagteware projekte in hierdie lyn, het Robertson gesê.
João Pedro de Freitas, Connor Robertson, en Mathias Smith – almal tans besig met hul meestersgrade in robotika by die departement elektriese ingenieurswese aan die Universiteit Stellenbosch – beoog om die menslike robot, George V1.0, teen die einde van die jaar te voltooi. Dr William Duckitt, ’n dosent aan dieselfde departement, begelei die studente. FOTO: Anja van Zyl
Menslike robotte kan binnekort help met daaglikse take
Oor die toekoms van menslike robotte in die samelewing, het Robertson gesê dat hulle hoop dat menslike robotte binnekort in staat sal wees om saam met mense te woon en werk.
“As ons geringe en herhalende take na robotte kon aflaai, kan ons soveel tyd gedurende die dag gebruik om te fokus op die dinge wat ons werklik wil doen,” het Robertson gesê.
“George is tans in die vroeë stadiums van ontwikkeling. Ons het hom ontwerp om uiters modulêr te wees, wat ons in staat stel om komponente en sagteware baie maklik uit te ruil, wat die spoed waarteen ons ontwikkel, verhoog,” het Robertson gesê.
“Ons beoog om plaaslike menslike robotte teen ʼn baie kleiner koste te vervaardig in vergelyking met alternatiewe wat ingevoer moet word.”
George V0.1 word tans gebruik as ʼn navorsingsplatform vir toekomstige hardeware- en sagteware projekte in hierdie lyn, volgens Connor Robertson, ʼn meestersgraadstudent aan die Universiteit Stellenbosch wat aan die mensagtige robot gewerk het. George V0.1 is uiters modulêr ontwerp, sodat die studente maklik komponente en sagteware kan uitruil, om die spoed waarteen hul werk te verhoog, het Robertson gesê. VIDEO: Anja van Zyl